नवी दिल्ली : अमेरिकेने २००९ पासून एकूण १८,८२२ भारतीय नागरिकांना हद्दपार केले. यात जानेवारी २०२५ पासून हद्दपार केलेल्या ३,२५८ भारतीयांचा समावेश आहे, असे परराष्ट्रमंत्री एस. जयशंकर यांनी गुरुवारी राज्यसभेत सांगितले. पुरवणी प्रश्नांना उत्तर देताना जयशंकर म्हणाले की, मानवी तस्करीच्या प्रकरणांची चौकशी राज्यांनी तसेच राष्ट्रीय तपास यंत्रणेने (एनआयए) केली आहे. यात पंजाबमध्ये सर्वाधिक प्रकरणे नोंदवली गेली आहेत.
२००९ पासून एकूण १८,८२२ भारतीय नागरिकांना हद्दपार करण्यात आले आहे. २०२३ मध्ये ६१७ भारतीयांना आणि २०२४ मध्ये १,३६८ भारतीयांना हद्दपार करण्यात आले, असे मंत्र्यांनी सांगितले. जानेवारी २०२५ पासून अमेरिकेने एकूण ३,२५८ भारतीय नागरिकांना हद्दपार केले आहे. यापैकी २,०३२ भारतीय (अंदाजे ६२.३ टक्के) नियमित व्यावसायिक उड्डाणांनी परतले आणि उर्वरित १,२२६ भारतीय (३७.६ टक्के) यूएस इमिग्रेशन अँड कस्टम्स एन्फोर्समेंट (आयसीई) किंवा कस्टम्स अँड बॉर्डर प्रोटेक्शन (सीबीपी) द्वारे चालवल्या जाणार्या चार्टर विमानांनी परतले, असे ते म्हणाले.
पूरक प्रश्नांना उत्तर देताना जयशंकर म्हणाले की, एनआयएने काही वर्षांपूर्वी मानव तस्करी विरोधी सेलची स्थापना केली होती. राज्यांनी अशा प्रकरणांची चौकशीदेखील सुरू केली आहे. एनआयएने मानवी तस्करीच्या २७ प्रकरणांमध्ये एफआयआर नोंदवले आहेत आणि तपास केला आहे, ज्यामुळे १६९ जणांना अटक करण्यात आली आहे.
